Àteros piessignos

S'òpera

In sa parte in antis de su libru, cuncretamente un´istùdiu de sotziologia de sa literadura, Arca mustrat sos mercados de sas ideas e sos mercados editoriales chi ant postu a campu dificultades medas pro su cumprimentu de una narradiva normale fata in sa limba de sos sardos; e custu pro esaltare s´iscritura in una limba anzena, non cudda de sa Natzione – su sardu –, ma cudda de s´Istadu: s´italianu.
Sa parte de duas est un´istùdiu, prus de cantitade chi de calidade, de sos narradores contemporànios in limba sarda. Nemos ischit de a beru cantos sunt. Antoni Arca nd´at contadu unos 200 e at tzensidu prus de 180 libros. Sa parte manna de cuddos volùmenes, però, sunt libros fantasma, ca non tenent editore (e duncas mancu ISBN o pretziu), onni tandu mancu s´indicazione de sa tipografia e, bortas meda, peruna distributzione.
Eperò, totus sunt libros chi cunfirmant s´esistèntzia de una literadura in limba sarda chi no est possìbile de numerare cun sas normas de su mercadu, nen culturale nen editoriale. Autores chi iscrient pro sarvare su mundu immentras su mundu s´est olvidadu de issos etotu.