Ivo Murgia est nàsciu in Casteddu in su 1974 e est bivendi in Pirri. S´est adotorau in Psicologia e at fatu su master Approcci interdisciplinari nella didattica del sardo in sa Universidadi de Casteddu. At fatu parti a atòbius e pubricatzionis apitzus de sa literadura de oi in lìngua sarda. At scritu cantzonis e contus chi ant premiau in is cuncursus literàrius de s´Ìsula (Premio Ozieri, Montanaru, Benvenuto Lobina, Su Fermentu, Santa Barbara-Silius etc.). Contus de issu funt bessius in galitzianu tradùsius de Xavier Frías Conde, scridori e linguìsta de is universidadis de Madrid e de Boèmia in Pilsen. Scrit in is giornalis Sa Republica Sarda, Sardinna, La Patrie dal Friûl e tenit unu blog in sardu: www.ivomurgia.splinder.com chi est giai un´annu e mesu on line. At pubricau tres lìburus: Contus Africanus (Alfa Editrice, 2004), Crònaca de una morti annuntziada (Condaghes, 2006) e Giuanni Batista Tuveri cun Gianfranco Contu (Alfa Editrice, 2007). De Crònaca Riccardo Pittau, sonadori de trumba, e Antonella Puddu, atrixi de tiatru, nd´ant fatu unu spetàculu de reading-cuntzertu. Cosa sua si nd´agàtat finas in internet e in arregortas de poesias e de contus. Est traballendi in s´Ufìtziu Lìngua Sarda de su cumunu de Cuartu Sant´Aleni (CA) e sighendi a fai paricis progetus po su sardu.
|