Raimondo Carta Raspi (Aristanis, 1893 - Casteddu, 1965) fiat istòricu, libràriu, editore e organizadore de cultura sarda. Laureadu in Sièntzias Sotziales, est istadu in sa tzitade nadia sua finas a su 1911. Si nche est cambiadu a Casteddu e a pustis a Firenze. Est torradu a Casteddu in su 1922 e at cumintzadu deretu sa fundatzione de ´Il Nuraghe´, aunida a sa rivista omònima ghiada da isse matessi pro sete annos, una libreria (in pratza Màrtiri in Casteddu), una biblioteca itinerante, una butega de arte e una domo de imprenta cun tìtulos de paritzos autores. Si est ocupadu finas de literatura, teatru e novellistica. In su 1936 e in su 1937 at publicadu Ugone III d´Arborea e Le due ambasciate di Luigi I d´Anjou e sos duos condaghes inèditos de Santa Maria de Bonàrcado e de Santu Nigola de Truddas. In su 1944 est essidu s´opùsculu: Verso l´autonomia.
|